SIRVENTES
retour à Histoire
Oc
Guilhem Figuèra ("D'un sirventes far" - 1226)
Original, (version intégrale) en occitan du XIIIe siècle

Traduction

 

D'un sirventes far en est son que m'agensa
no-m volh plus tarzar ni far longa bistensa
e sai ses doptar qu'eu n'aurai malvolensa
si fas sirventes
dels fals d'engans ples
de Roma que es caps de la decazensa
on dechai totz bes.

No-m meravilh ges Roma si la gens erra
que-l segle avetz mes en trebalh et en guerra
e pretz e merces mor per vos e sosterra
Roma enganairitz
qu'etz de totz mals guitz
e cima e razitz que-l bons reis d'Englaterra
fon per vos trahitz.

Roma trichairitz cobeitatz vos engana
qu'a vostras berbitz tondetz trop de la lana
lo Sans Esperitz que receup carn umana
entenda mos precs
e franha tos becs
Roma no m'entrecs car es falsa e trafana
vas nos e vas grecs.

Roma als omes pecs rozetz la carn e l'ossa
e guidatz los secs ab vos ins en la fossa
e passatz los decs de Deu car trop es grossa
vostra cobeitatz
car vos perdonatz
per deniers peccatz Roma de gran trasdossa
de mal vos cargatz.

Roma ben sapchatz que vostra avols barata
e vostra foudatz fetz perdre Damiata
malamen renhatz Roma Deus vos abata
en decazemen
ar trop falsamen
renhatz per argen Roma de mal'esclata
e de mal conven.

Roma veramen sai eu senes doptansa
qu'ab galiamen de falsa perdonansa
liuretz a tormen lo barnatge de Fransa
lonh de paradis
e-l bon rei Lois
Roma avetz aucis qu'ab falsa predicansa
l traissetz de Paris.

Roma als sarrazis faitz vos pauc de damnatge
mas grecs e latis metetz e carnalatge
ins el foc d'abis Roma faitz vostre estatge
en perdicion
ja Deus part no-m don
Roma del perdon ni del pelegrinatge
que fetz d'Avinon.

Roma ses razon avetz manhta gen morta
e ges no-m sab bon car tenetz via torta
qu'a salvacion Roma serratz la porta
per qu'a mal govern
d'estiu e d'invern
qui sec vostr'estern car diables l'en porta
ins el foc d'enfern.

Roma be-is decern lo mals qu'om vos deu dire
car faitz per esquern dels crestians martire
mas en qual quadern trobatz qu'om deia aucire
Roma-ls Crestians ?
Deus qu'es verais pans
e cotidians me don so qu'eu desire
vezer dels romans.

Roma vers es plans que trop fotz angoissosa
dels perdons trafans que fetz sobre Toloza
trop rozetz las mans a lei de rabiosa
Roma descordans
mas si-l coms prezans
viu ancar dos ans Fransa n'er doloroza
dels vostres engans.

Roma tant es grans la vostra forfaitura
que Deu e sos sans en gitatz a non cura
tant etz mal renhans Roma falsa e tafura
per qu'en vos s'escon
ei-s magra ei-s cofon
lo jois d'aquest mon e faitz gran desmezura
del comte Raimon.

Roma Deus l'aon e-lh don poder e forsa
al comte que ton los frances e-ls escorsa
e fa-n planca e pon quand ab els se comorsa
et a mi plaz fort
Roma a Deu recort
del vostre gran tort si-l plaz e-l comte estorsa
de vos e de mort.

Roma be-m conort quez en abans de gaire
venretz a mal port si l'adregs emperaire
mena adreg sa sort ni fai so que deu faire
Roma eu dic ver
que-l vostre poder
veirem dechazer Roma lo vers Salvaire
m'o lais tost vezer.

Roma per aver faitz manhta vilania
e manht desplazer e manhta felonia
tan voletz aver del mon la senhoria
que ren non temetz
Deu ni sos devetz
ans vei que fazetz mais qu'eu dir non poiria
de mal per un detz.

Roma tan tenetz estreg la vostra grapa
que so que podetz tener greu vos escapa
si-n breu non perdetz poder a mala trapa
e lo mons cazutz
e mortz e vencutz
e-l pretz confondutz : Roma la vostra papa
fai aitals vertutz.

Roma cel qu'es lutz del mon e vera vida
e vera salutz vos don mal' escarida
car tans mals saubutz faitz per que lo mons crida
Roma desleials
razitz de totz mals
els focs enfernals ardregz senes falhida
si non pensatz d'als.

Roma als cardenals vos pot om sobreprendre
per los criminals peccatz que fan entendre
que non pensan d'als mas com poscam revendre
Deu e sos amics
e no-i val castics
Roma grans fastics es d'auzir e d'entendre
los vostres prezics.

Roma eu sui enics car vostre poders monta
e car grans destrics totz ab vos nos afronta
car vos etz abrics e caps d'engan e d'onta
e de dezonor
e-lh vostre pastor
son fals trichador Roma e qui-ls aconta
fai trop gran folor.

Roma mal labor fa-l papa quan tensona
ab l'emperador pel dreg de la corona
ni-l met en error ni-ls seus guerriers perdona
car aitals perdos
que non sec razos
Roma non es bos enans qui l'en razona
reman vergonhos.

Roma-l glorios que sofri mortal pena
en la crotz per nos vos donc mal'estrena
car voletz totz jors portar la borsa plena
Roma de mal for
que tot vostre cor
avetz en tresor don cobeitatz vos mena
el foc que no mor.

Roma del malcor que portatz en la gola
nais lo socs don mor lo mons e s'estrangola
ab doussor del cor per que-l savis tremola
quan conois e ve
lo mortal vere
de lai on ve Roma del cor vos cola
don li peitz son ple.

Roma ben ancse a om auzit retraire
que-l cap sem vos te per que-l faitz sovenraire
per que cug e cre qu'ops vos auria traire
Roma del cervel
car de mal capel
etz vos e Cistel qu'a Bezers fezetz faire
mout estranh mazel.

Rom' ab fals sembel tendetz vostra tezura
que man mal morsel manjatz qui que l'endura
car avetz d'anhel ab simpla gardadura
dedins lops rabatz
serpens coronatz
de vibr'engenratz per que-l diable-us cura
coma-ls seu privat
.